Жинлар
Савол: Жин деган мавжудот борми? Агар бор бўлса, улар ҳам одамларга ўхшаб эркак ва аёл қилиб яратилганми ва амалларидан жавобгарми?
Жавоб: Инсонлар дастлаб тупроқдан яратилганидек жинлар ҳам ўтдан яратилган. Жинларнинг ҳам эркаги ва аёли бўлади. Уларнинг уйланиши, уй-жойлари, еб-ичишлари, кўпайишлари, ўлишлари ҳақида ҳамда Муҳаммад алайҳиссалом уларга ҳам Пайғамбар сифатида юборилгани, Қуръони каримни тинглашлари, ибодат қилишлари, садақа беришлари, яхши амалларига савоб берилиши, кофир жинлар жаҳаннамга, мўмин жинлар эса жаннатга кириши ва жаннатда Аллоҳу таолони кўришлари ҳақида турли китобларда ёзилган.
Жинларнинг инсон олимларига савол бериб фатво олишлари, инсонларга ваъз қилишлари, шеър ўқиб эшиттиришлари, касалликларни даволаш ва дориларни ўргатишлари, инсондан қўрқишлари ва инсонларга итоат қилишлари ҳақида олимларимизнинг кўплаб асарлари, ёзувлари мавжуд. Бу китоблар жинларнинг мавжудлигини кўрсатади.
Шунингдек, жинларнинг инсонларга берадиган зарарларига қарши чора кўриш, улардан ҳимояланиш, кичик жинлар катталарига итоат қилиши, яхшиликка яхшилик, ёмонликка ёмонлик билан жавоб беришлари, инсонларни масхара қилишлари, одамдек уларнинг ҳам кўзи тегиши, айниқса Рамазон ойида қутуришлари, инсонлар билан бирга ибодат қилишлари, оламлар сарвари пайғамбаримизнинг Умми Маъбад чодирида меҳмон бўлганларини Макка аҳлига хабар берганлари, Умми Маъбаднинг мусулмон бўлганини билдиришлари, Бадр жангидан хабар беришлари, ўтмишдаги нарсаларни жиндан сўраш жоизлиги, аммо келажак ҳақида сўраш жоиз эмаслиги, муаззинларнинг азонига қиёматда жинлар гувоҳлик бериши, ҳазрати Умар вафот этганда марсия ўқиганлари, ҳазрати Усмон шаҳид бўлганда йиғлаганлари, ҳазрати Али шаҳид бўлганида хабар берганликлари, ҳазрати Ҳусайн шаҳид бўлганида йиғлаб, додлаганликлари ва бошқа саҳобалар шаҳид бўлганлигини билдирганлари, Умар бин Абдулазизнинг вафотини хабар берганлари, имоми Аъзам Абу Ҳанифа ва имоми Шофиъий ҳазратлари вафот этганда йиғлаганлари, жиннинг инсон қалбига васваса бериши каби кўплаб машҳур воқеа ва ишлар қийматли китобларда ёзилган. Буларнинг барчаси жинларнинг борлигига далилдир.
Савол: Жинларни инкор қилган киши кофир бўладими? Жинлар ҳам жаннатга кирадими?
Жавоб: Жинлар турли шаклларга кириш қобилиятига эга. Уларнинг мусулмонлари ва кофирлари бор. Улар ҳам диний буйруқларга амал қилишга масъулдирлар. Бор эканликлари Қуръони карим ва ҳадиси шарифлар билан исботланган. Инкор қилган киши кофир бўлади. Қуръони каримда маолан бундай дейилган: “Мен жинларни ва инсонларни фақат Менга ибодат қилишлари учун яратдим”. (Зориёт, 56)
“Жаҳаннамни инсонлар ва жинлар билан тўлдираман”. (Ҳуд, 119; Сажда, 13)
“Биз бир гуруҳ жинни Қуръон тинглашлари учун Сенинг ҳузурингга юборган эдик”. (Аҳқоф, 29)
Ибн Масъуд ҳазратлари хабар беради: “Бир кеча Расулуллоҳ орамиздан ғойиб бўлдилар. Ҳар томондан қидирдик, топа олмадик. Эрталаб Ҳиро томондан келаётганларини кўрдик. “Ё Расулаллоҳ, сизни изладик”, дедик. У зот: “Менга жинлардан бир даъватчи келди. У билан бирга бордим ва уларга Қуръони карим ўқиб бердим”, деб марҳамат қилдилар”. (Тафсири Қуртубий)
Бир ҳадиси шарифда “Азон айтаётганда овозингни кўтар! Чунки азон ўқиганнинг овозини эшитган бутун инсон ва жинлар қиёматда унга гувоҳлик беради” деб марҳамат қилинган. (Бухорий)
Барча олимларга кўра, кофир жинлар жаҳаннамга тушади. Мўмин жинлар ҳақида эса турли қарашлар бор:
1. Инсонлар каби муомала кўрадилар.
2. Жаҳаннамга кирмайдилар, аммо тупроққа айланадилар.
3. Жаннатнинг “Рабад” деб аталган жойида бўладилар. Дунёдагининг аксига, жаннатда инсонлар уларни кўради, лекин улар инсонларни кўра олмайди.
Жинлар бир неча бор Пайғамбаримизнинг ҳузури шарифларига келиб, у зотни тинглаганлар. Расулуллоҳ уларга “Раҳмон” сурасини таблиғ ниятида ўқиб берганлар.
“Эй инсонлар ва жинлар, Раббингизнинг қайси неъматини инкор эта оласиз?” ифодаси бўлган ояти каримадан сўнг, жинлар: “Раббимизнинг ҳеч бир неъматини инкор этмаймиз, эй Раббимиз, Сенга ҳамд бўлсин”, деб жавоб берган эди.
Бу сура уларнинг ҳам диний буйруқ ва тақиқларга мукаллаф эканига далолат қилади. Чунки ушбу сура “Сақалайн”га [инсон ва жинга] хитоб этмоқда.
Қуръони карим оятлари ва ҳадиси шарифлар уларнинг ҳам мукофот ва жазо учун ҳашр қилинишига [қайта тирилишига] далолат қилади. Бундан мўмин жинларнинг жаннатга, кофирларининг эса жаҳаннамга кириши маълум бўлади.
Имоми Бухорий айтганлар: “Жин” сурасининг: “Ҳақиқатан, биз ҳидоят раҳбари бўлган Қуръони каримни тинглагач, Унга иймон келтирдик. Ким Раббига иймон келтирса, у баҳсдан ва раҳокдан қўрқмайди”, маолидаги 13-ояти каримасидаги “баҳс” - мукофотнинг кам берилишини, “раҳок” эса лойиқ бўлмаган жазони кўришни англатади. Бу ояти карима уларнинг қилган яхшиликлари учун мукофотлари тўлиқ берилишига ва гуноҳлари учун ортиқча жазоланмасликларига далолат қилади. (Авн-ул-мурид)
